喺西環七臺嘅青蓮台上,有一座被列為一級歷史建築嘅廟宇,亦係全港唯一供奉魯班嘅廟宇,魯班先師廟。

魯班先師廟據廟內石碑嘅記載係建於清朝光緒10年(1884年),係香港三行同業為供奉百匠之師魯班而興建嘅,當年捐款合資嘅人多達1172個,其中就以新會、新甯、順德同埋開平人為主,每個籍貫都有200人以上捐款

既然係供奉百匠之師魯班嘅廟宇,成座建築當然唔會失禮人。魯班廟屬於兩進式建築,正脊就有「石灣瓦脊」同埋各式嘅「石灣公仔」、瑞獸;而壁畫方面就有「張騫泛槎圖」、「風雨歸舟圖」、「夜遊赤壁圖」等,數量上係全港華人廟宇最多嘅一間;再加上唔少精美嘅泥塑,完全體現緊當年工匠嘅巧手。

講到咁精彩,點解魯班廟都只係一級歷史建築呢?原來當年西環山嘅地主李寶龍生意失敗之後要賣山還債,本來魯班廟亦都要拆卸。好在新地主就允許保留古廟,仲將古廟業權交畀廣悅堂廟宇管理公司接管。只係呢個地方曾經多次易手,業權一直未能釐清,所以暫時都列唔到做法定古蹟。

原圖嚟自網絡