YouTube創辦人Jawed Karim 上載第一條影片Me at the Zoo

15年前嘅2月14日係影片分享網站YouTube註冊嘅日子，咁第一條上載到呢個網站嘅影片又係幾時呢？答案就係當年嘅今日喇！

短短15年時間，YouTube就已經成為全球最大嘅影片分享網站。呢個網站最初係由三個後生仔創立，以「Broadcast Yourself」作為網站口號，咁到底第一條影片又係點呢？

第一條影片喺2005年4月23日晚上8點27分由其中一位創辦人Jawed Karim上傳，而當時嘅片段就係佢身處美國加州嘅聖地牙哥動物園，企喺大象面前嘅場景。呢條影片嘅標題就係簡單直接叫做Me at the Zoo，短短19秒嘅片段，內容真係講緊創辦人企喺大象面前，真係估你唔到。而作為第一條上傳到YouTube嘅影片，到咗依家已經有9000萬觀看人次，亦都標註住YouTube呢個平台嘅使用方式，真係「Broadcast Yourself」。