呢排留喺屋企閒來無事，阿史就執咗下書櫃，搵返唔少當年好經典嘅書本畫集，其中一本就係關於呢位中國近代美術史上嘅傳奇人物—李鐵夫。

李鐵夫，原名玉田，既係油畫家、又係書法家同詩人，喺中國油畫歷史上係里程碑式人物，因為佢將現代中國油畫同西方藝術接軌，所以佢又被稱為中國油畫之父。至於點解會有「東亞畫壇第一巨擘」呢個稱呼，原來係國父孫中山先生對佢嘅稱譽。

喺李鐵夫16歲（1885年）嘅時候，佢就已經跟隨叔父去到舊金山留學，亦都係呢段時間開始自學畫畫。後來就到英屬加拿大阿靈頓美術學院、英國皇家藝術學院學習，最後1912年仲入埋美國紐約藝術大學。李鐵夫可以話係第一個將西方油畫功藝融入中國傳統文化嘅人，佢比出國留學嘅第一代畫家好似馮鋼百、李叔同、徐悲鴻等早咗成二十年嘗試中國油畫。

有關李鐵夫，唔單止係油畫方面出名，喺革命方面都同樣人所共知。李鐵夫追隨孫中山先生進行革命活動，有參加興中會、亦都喺美國建立同盟會，革命期間多次協助孫中山募款，甚至冒死策反，真係膽色過人。提起佢經典嘅畫作，唔知史友們又會諗起邊一幅呢？

原圖嚟自網絡