黃泥涌峽道係二戰戰場之一？

話說尋日就有一位軍事迷帶住金屬探測器去行黃泥涌峽道尋寶，點知就喺5米深嘅地下度發現30粒戰時嘅彈殼，當中仲有埋一批金屬裝置，最後由爆炸品處理課人員到場帶走呢批1公斤嘅戰時炸藥。咁到底點解會喺呢個地方有呢批炸藥呢？咁就同二次世界大戰有關喇！

點知喺12月17日，日軍就已經喺北角登陸，兩日之後就喺黃泥涌峽道展開呢場激戰。喺1941年12月19日，呢個地方匯集咗各國軍人，為嘅只有一個目的，就係想阻止日軍入侵港島。喺深圳河同埋醉酒灣防線防線都失守之後，要守護港島就只係得返黃泥涌峽、灣仔峽、渣甸山呢幾個港島中部嘅天險。

而據事後嘅紀錄，原來當時進入黃泥涌峽道嘅日軍230聯隊，最初係諗住去大坑同埋禮頓山，但點知就因為唔識路走咗入金督馳馬徑再入埋黃泥涌峽。當時日軍嘅人數就有五千幾人，各國守軍加埋就只有一千。經過一日奮戰，呢場戰爭入面，守軍嘅一方就有461人陣亡，而日軍就傷亡超過800人。由於傷亡太慘重，即使係戰勝嘅一方都未能收拾同胞嘅遺體，需要即時火化，至於守軍方面，就被日軍拎走所有名牌，部分人仲曝屍荒野，直到60年代都仲有唔少行山人士發現戰事所留下嚟嘅骸骨。