灣仔北帝廟 清朝廟宇竟然有明朝雕像？

繼續帶史友們遊走灣仔，沿住石水渠街向上行，會有一座由華人廟宇委員會負責管理嘅廟宇，曾經呢座廟宇舉辦嘅「北帝誕」令到成個灣仔萬人空巷。阿史到底講緊邊座廟？之唔係灣仔北帝廟囉！

灣仔北帝廟，又叫做玉虛宮，據估計係喺清朝同治二年建成，百幾年嚟就曾經進行多次重修，通通都喺碑誌上有所記錄。呢座三進兩開間嘅建築早年係由灣仔坊眾集資興建而成，單係睇廟宇規模同埋各類裝飾、石灣陶瓷，就可以聯想到當時嘅灣仔街坊係幾富有！

玉虛宮無疑係清朝嘅廟，但原來當中供奉嘅係一尊明朝嘅雕像。廟內供奉住一尊重600幾公斤嘅北帝雕像，而北帝嘅左腳上面就寫住「大明萬曆三十一年(1603年)歲次癸卯仲秋(中秋節)吉旦立」，而且仲有寫明係屬於「廣東珠池市碧善宮」。咁點解呢尊雕像會嚟到香港？原來後來廣東因為戰亂，就有一位叫做曾富嘅香港商人喺1926年從廣州買入呢尊雕像，本身就供奉喺自己屋企嘅「五龍院」，後來日佔時期要起機場，呢尊雕像就被送到北帝廟喇！