道光皇帝封林則徐為欽差大臣之後，林則徐就到咗廣東查封鴉片。响接落嚟嘅數個月，繳煙二萬零二百八十三箱，並响虎門公開銷煙。而呢個舉動亦都觸動到當時英國嘅神經，後來仲成為爆發第一次鴉片戰爭嘅導火線。

相信史友以前讀書都讀過，林則徐虎門係銷煙唔係燒煙（記得大台以前有套劇係講林則徐以火燒毁鴉片....），銷煙方法就係「煮化煙土」。咁即係點呢？鴉片係從罌粟中提煉出來嘅一種萃取物，其主要成分是生物堿。响以往要破壞生物堿嘅最好辦法就係以生石灰嚟化解。所以，林則徐就命人以生石灰撒响鴉片度，再以海水令鴉片，生石灰遇水會產生高溫，呢個化學反應會破壞鴉片中生物堿嘅結構。等到鴉片毒性被分解後，响退潮時啲壞咗嘅鴉片就隨讓海水沖入大海裡面。所以點解林則徐會响虎門銷煙，亦有呢個天然環境嘅考慮。

不過，其實林則徐都唔係未試過以火燒毁鴉片，林則徐曾經响奏摺〈銷化煙土已將及半折〉中提及過 ：「至銷毀之方，亦復熟籌屢試。向來用火燒化，伴以桐油，其法未嘗不善。第訪聞焚過之後，必有殘膏餘瀝，糝入地中，積慣熬煎之人，竟能掘地取之，十得二三，是流毒仍難盡絕。臣等廣咨博採，知鴉最忌者二物，一曰鹽滷，二曰石灰」。就係因為以桐油火燒鴉片效果唔理想，於是就用「煮化」 之法。

今時今日如果史友們去虎門鴉片戰爭紀念館，館裡就有林則徐銷煙池同虎門炮台舊址。對於中國近代史而言呢個地方真係非常重要，如果從事教育界嘅史友們不妨考慮遲啲帶學生去參觀遊覽。

原圖嚟自網絡