英國東印度公司 來華大賣鴉片

講到清代鴉片問題，有一間外國「公司」就不得不提，就係東印度公司。

英國東印度公司成立於1600年，最初係印度從事貿易嘅企業，後嚟慢慢成為壟斷英國同遠東貿易嘅龐大組織。實際上，以往唔單止英國有東印度公司，仲有荷蘭東印度公司，都係從事歐洲至遠東地區貿易業務。講返英國東印度公司，之所以話佢係龐大組織，因為佢唔單單止係一個貿易公司咁簡單，仲係一個從事殖民管理同擁有軍事力量嘅組織，印度後嚟成為英國殖民地可以話係由東印度公司植根南亞地區開始。

至於英國東印度公司同鴉片有乜關係呢？呢個就關係到佢哋攞到專利權。响十八世紀晚期，東印度公司就攞到銷售同製造鴉片嘅特權。英國東印度公司响印度大量種植鴉片，仲賣去中國。隨着鴉片貿易嘅發展，英國東印度公司賺大錢，但鴉片毒禍就慢慢响中國成為經濟同社會問題。不過，英國東印度公司對華嘅貿易專利，就响1832年被英國國會廢止咗，改由英國駐華商務監督署管理對華貿易事務。往後幾年兩國之後就因貿易而出現糾紛，最終爆發咗鴉片戰爭。