港腳商人促成販運鴉片？

喺第一次鴉片戰爭之前，清朝係處於重新開海嘅階段，但喺乾隆年間就只係允許「一口通商」，所有外國商人就只可以到廣州進行貿易。而且，所有外國商人無論係銷售定係購買，都唔可以自己進行，而係要通過「行商」，以上唔少嘅規定去到第一次鴉片戰爭之前都仍然維持。咁既然有咁嚴格嘅規定，點解又會有鴉片流入到呢？原來同一班「港腳商人」有關！

呢度所講嘅「港腳商人」並唔係指香港嘅商人，而係Country trader指好似今日中介、買手角色嘅人，佢哋主要為當時英國喺東南亞一帶經商嘅英國公民、印度人等服務。由於17世紀到19世紀嘅印度、東印度群島同中國之間都有唔少貿易交流，兩地之間嘅貿易叫做港腳貿易，所以呢班自由身份嘅商人又叫做港腳商人。

早年佢哋主要係幫手喺英國帶棉紡織品到中國，再喺中國將茶葉、中國古代文物、珠寶、白銀等運返英國本土，但後來就調返轉，喺其他地方好似印度咁，將鴉片運入中國，佢哋嘅出現，間接促使咗自由貿易嘅發生。早年唔單止有「港腳商人」，仲有「港腳公司」，最出名就有當時嘅怡和洋行、寶順同埋旗昌都其中一份子。