喺1919年嘅5月4日,即係101年前嘅今日,係「五四運動」發生嘅日子。喺呢一日,以學生為主,加上廣大市民、工商界人士都一同庭加示威遊行、罷工罷課等多形式嘅運動,目的就只係想對抗當時嘅北洋政府,達到「外爭國權,內除國賊」。

「五四運動」嘅起因就要由第一次世界大戰結束之後嘅巴黎和會講起,當時中國同埋日本都係戰勝國,但由於當時山東嘅權益係被一次世界大戰嘅戰敗國德國控制,巴黎和會上歐洲嘅列強就想將呢樣權益轉讓畀日本。呢個決定當然引起唔少國人嘅不滿,但更加不滿嘅係當時嘅北洋政府並未有捍衛到國家嘅利益,所以就令到唔同階層嘅人都通過各種方式上街表達。

呢場反西方殖民主義運動有過唔少插曲,仲蔓延到唔少中國其他城市,引發一連串罷工同埋抵制行動。最後,北京政府喺巴黎和會上拒絕喺和平協定上簽字,唔單止咁,呢場運動仲為近代中國喺政治、教育、思想方面都帶嚟重大影響。

原圖嚟自網絡