清朝第一個不平等條約—「南京條約」

呢排阿史同大家介紹過第一次鴉片戰爭前後發生過嘅事，史友們應該係對當時嘅清朝社會同埋清政府內部有基本嘅認識。咁打輸咗呢場仗之後，清朝要面對一個咩結果呢？其中一個答案就係「南京條約」。

「南京條約」又叫做《江寧條約》、係清朝第一條因為戰敗畀歐美國家而簽落嘅不平等條約。喺1839年3月，由於林則徐到廣州嚴禁鴉片，同英方產生貿易、司法、外交等方面嘅衝突，令到英國政府內閣喺同年10月決定派遣遠征軍到中國。戰爭以1842年7月鎮江1500位八旗兵與英軍展開激烈巷戰而戰敗作結，經過喺靜海寺多次嘅談判，最後雙方去到英軍旗艦汗華麗號上正式簽訂《南京條約》。

咁《南京條約》入面又咩內容呢？除咗開放釋放對方軍民、賠償二千一百萬銀圓，清朝仲需要開放「五口通商」、廢除公行制度、建立進出口關稅，而最重要嘅係，將當時嘅香港島交畀英國管理。