1842年清政府同英國簽訂咗《南京條約》,作為戰敗國嘅清政府,要開放五口通商、割讓香港島、二千一百萬銀元等。清政府被迫打開國門之餘,有兩個國家好快嚟攞著數。邊兩個國家呢?就係法國同美國。

其實响《南京條約》簽署後無耐,清政府同英國响1843年簽訂《五口通商章程》同《五口通商附粘善後條款》,主要內容包括承認英國享有在華領事裁判權;規定海關稅率值百抽五;規定英人可在租地內建屋永久居住(發展至後嚟各國在華「租界」)等。好喇!英國响清政府攞咗著數之後,美國同法國就聞風而至,响1844年分別簽署《黃埔條約》以及《望廈條約》。《黃埔條約》又稱《中法五口通商章程》,係清政府同法國簽署第一條不平等條約。而《望廈條約》又稱《中美五口貿易章程》,係清政府同美國簽署第一條不平等條約。通過呢兩條不平等條約,美國同法國攞到同英國响《南京條約》同《虎門條約》攞到嘅「著數」。而响《黃埔條約》同《望廈條約》當中,都列明十二年後同中國再行籌議。呢個續約條款,亦成為咗十幾年後法國同英國聯合攻打中國嘅遠因。

原圖嚟自網絡