呢幾日阿史都同大家介紹返唔少第一、二次鴉片戰爭嘅故事,咁當中最重要嘅人物除咗有第一次鴉片戰爭林則徐之外,喺第二次鴉片戰爭入面就有一位清朝名將僧格林沁。

僧格林沁係晚清軍事上一個相當重要嘅軍事人物,要介紹佢,就要由個名講起。「僧格林沁」係來自藏語,「僧格」係解做「獅子」、而「林沁」就係「珍寶」。佢既係成吉思汗細佬拙赤合撒兒嘅後代,又係嘉慶帝嗣外孫。活躍喺道光、咸豐、同治三個朝代嘅佢,唔單止參加過太平天國嘅北伐,仲喺第二次鴉片戰爭入面付出唔少血汗。

僧格林沁嘅戰績早起清文宗咸豐三年就已經開始,當時佢領兵大敗太平天國北伐軍,同年仲剿滅太平天國李開芳部。喺1857年佢就開始做埋欽差大臣,管理天津防務。雖然第二次鴉片戰爭係以失敗告終,但僧格林沁其實喺1859年大沽口海戰上曾經大敗英法聯軍。去到1860年,大沽口、天津失守,佢就帶同蒙古騎兵同英法聯軍展開八里橋之戰,呢次就迎來慘敗。

由於蒙古主力盡喪,僧格林沁亦都被奪爵,但就保留欽差大臣一職。呢位傳奇人物,後來就奉旨「剿捻」,即係反清農民軍,但就喺同治四年(1865年)嘅高樓寨之戰入面戰死。

原圖嚟自網絡