戰後香港首個興建同規劃嘅工程—聯和墟

早幾日同大家介紹完上水廖氏建立嘅石湖墟，而喺石湖墟斗運行一段時間之後，就傳言話因為墟主上水廖氏多收秤佣同埋公秤唔準確等問題，令到粉嶺區鄉民自行建立一個新墟，亦即係聯和墟。

講返聯和墟嘅歷史，早喺1949年10月開始，就已經有粉嶺、沙頭角、打鼓嶺等居民開始集資，而去到1951年就正式成墟。據估計，興建聯和墟就當年就用咗200萬。最早期嘅聯和墟面積達到61萬平方米，有成200幾座建築物，而墟市亦都唔係成日開放，最初只係喺星期一、四同日三日開放，但後來就因為太過繁盛令到墟期消失。

聯和墟被稱為戰後香港首個興建同埋規劃嘅工程，當中就建立咗一個有蓋嘅墟市，既有一般嘅街市，又有露天小販嘅攤位，後來仲有埋茶樓餐室、攝影沖曬、理髮廳、電影院等建築物。而去到2002年，好有象徵意義嘅街市就停止運作，唔少當年嘅建築物都已經被拆除。