喺19世紀初,英國人掌控咗接近九成喺中國進行嘅鴉片貿易之後,其餘嘅一成就係由美國人掌握。之前阿史都提過,外國人要喺廣州做生意並唔係容易嘅事,除咗要有公行幫手做仲介,佢哋自己本身都會有貿易公司,而講到美國最出名嘅一間從事鴉片貿易嘅公司,就當然要提下廣州最大嘅美國商行,其中一間造就波士頓發展嘅公司—普金斯洋行(Perkins& Co.).

講起呢間普金斯洋行就巴閉喇,事關係佢當年行業嘅龍頭,借助借鴉片貿易發大達。普金斯洋行其中一位重要嘅人物叫做湯瑪斯珀金斯(Thomas Handasyd Perkins)就係靠走私鴉片而發達,據佢當年寫過畀廣州外甥嘅信表示,佢曾經試過走私15萬磅嘅鴉片去廣州,認真嚇死人。單係1826年,呢位湯瑪斯珀金斯嘅財富就已經有一百萬美金,即係今日嘅二千五百萬美金。靠走私鴉片發達嘅,普金斯洋行只係其中一間,仲有成個被稱為波士頓婆羅門(Boston Brahmins)嘅家族就好似卡伯特家族(The Cabots)、庫興家族(The Cushings)、韋爾德家族(The Welds)、德拉諾家族(The Delanos)等。

呢班家族本身已經係豪門,喺鴉片貿易獲得財富之後,就對波士頓進行唔少捐獻,就好似珀金斯兄弟捐贈過麻省總醫院(Massachusetts General Hospital)、麥克林醫院(McLean Hospital)和波士頓圖書館(Boston Athenæum),其他家族亦有捐獻過盲人學校同埋市政學校等。19世紀嘅波士頓,某種意義上就係由鴉片貿易塑造出嚟。

原圖嚟自網絡