讀到近代中國史同香港史，唔少重要嘅關頭都會出現一個人嘅名，佢叫做卡爾·弗里德里希·奧古斯特·居茨拉夫（Karl Friedrich August Gützlaff），中文名就即係郭士立。

郭士立係一位嚟自普魯士嘅傳教士，最初嚟到中國嘅目的只係傳教，但後來就同銷售鴉片扯上關係，到底當中係點樣一回事呢？1803年出生喺普魯士一個裁縫家庭嘅郭士立，幼年就開始學阿拉伯同埋土耳其話、後來就入到柏林神學院研究神學，冇幾耐仲做埋牧師，跟從一位英國漢學家學漢語同埋馬來語。

喺1831年，郭士立經歷過新加坡同埋馬六甲嘅傳教工作之後，佢先到達天津再去到澳門，亦都係呢個時候改名做郭士立。郭士立最初只係喺澳門一邊傳教、一邊行醫，但喺1832年就同埋東印度公司嘅胡夏米乘搭商船北上，途中三次旅行就去過廈門、福州、寧波、威海衛等，呢次經歷令到佢寫咗《1831-1833年在中國沿海三次航行記》，亦令佢更加精通漢語。

咁問題嚟喇，點解佢會由傳教去到銷售鴉片？原來呢三次旅行佢係要幫一位鴉片商查頓販售鴉片，郭士立未必係直接銷售，但就充當咗呢位鴉片商嘅翻譯，由於航海旅行要好高嘅支出，查頓開出嘅條件令到呢位傳教士答應邀請。郭士立事後認為自己嘅做法係錯誤，仲曾經喺自己本《東西洋考每月統記傳》寫過「鴉片流弊日甚，民窮才匱。無度生之法，會匪串同作弊矣。無惡不作，無弊不行，莫非嚴哉。」

而去到1840年鴉片戰爭，郭士立就做埋英軍司令官翻譯同埋嚮導，參與過起草《南京條約》；香港開埠之後，佢就擔任首任香港總督嘅中文秘書同埋撫華道，仲成立埋中國傳教會繼續傳教。

原圖嚟自網絡