呢幾日阿史都同史友們介紹咗唔少鴉片戰爭前後嘅人同事,而今次阿史就想講下一個好重要嘅地方,就係鄰近今日深圳嘅一個島,叫做內伶仃島,佢曾經係英國人走私鴉片嘅重要基地。

內伶仃島位處珠三角洲,字面意思係解做海上面一座孤獨嘅山。喺清朝年間,其實就有過禁煙令打擊鴉片貿易同埋走私活動,仲曾經喺1821年下令驅逐鴉片船,令到當時嘅英商唔敢再喺黃埔同埋澳門一帶進行交易。鴉片販運喺清朝嘅時候係犯法嘅行為,但東印度公司仍然喺印度生產同埋拍賣鴉片,再通過私商同埋散商偷運,呢個時候海上貿易路線圖就相當重要。

其實早喺鴉片戰爭之前,香港呢個地方對英國人嚟講已經好重要,因為鴉片貿易禁運令到歐洲往來中國、往來印度嘅航線大受影響,唔少西方商船都要經過大嶼山再上珠江,部分仲會經南丫島海峽再入內伶仃。由於航運路線嘅改變,令到鴉片躉船停泊喺伶仃島,再由本地煙販交錢提貨,就咁令到呢個島成為走私鴉片中轉站。

原圖嚟自網絡