哈佛大學嘅發展同鴉片商人有關？

尋日阿史就同史友們講到波士頓現代嘅發展同埋城市規模同販賣鴉片所獲取嘅財富有莫大嘅關係，但其實唔止係波士頓，連一啲高等學府早年都係同鴉片扯上關係。

提到喺清朝嘅走私鴉片，英國占咗當中嘅九成，而淨低嘅一成就係由美國嘅公司掌控，當時就有一間叫做羅素公司（Russell&Company），係一間好大規模嘅美國貿易公司，佢有另一個名，叫做旗昌洋行。早喺1819年，呢間公司就已經喺土耳其販賣鴉片到中國。喺呢間公司嘅背後，有一位好重要嘅人物，叫做沃倫.德蘭諾（Warren Delano Jr），佢係美國其中一位總統羅斯福嘅爺爺。

沃倫.德蘭諾喺1833年就加入咗旗昌洋行，成為洋行嘅合伙人，亦都喺十年之間得到大量財富，佢所屬嘅德蘭諾家族就因而致富，對唔少美國著名學府好似哈佛大學、耶魯大學、普林斯頓大學等都作出捐款。類似嘅家族仲有好多個，而哈佛大學當年就比較誇張，唔單止有接捐款，據西方學者安頓查特金(Anton Chaitkin)研究，唔少從事中國走私鴉片貿易嘅家族同埋佢哋嘅家人，都有從事過哈佛大學司庫、教職員、甚至哈佛大學嘅校長。