之前提及過,早於鴉片戰爭前,已經有美國商人到廣東做生意,有啲仲賣埋鴉片添。當時嘅廣州,亦係唔少越洋過海嘅美國人尋金之地。

點解佢哋會去廣東做生意呢?其實原因係好簡單,因為當時廣州係全中國唯一對外開放嘅城市。早响1784年,「中國皇后號」抵達中國,成為咗美國立國後第一艘抵達中國嘅船隻。响廣州買滿商品(主要係茶葉)後,就响1785年返到去紐約,「中國皇后號」嘅成功就成為咗唔少美國人搵到尋金嘅目的地,後嚟佢哋嘅做法就係响廣州派駐代理人,負責銷售同採購,普金斯洋行就係第一間响廣州落戶嘅美國商號。

實際上,呢條响十八世紀末形成嘅貿易航道,成為咗太平洋海上交通嘅要道之餘,仲改變咗北美政治環境。因為呢條航道出現,令依家加州一帶成為貿易重鎮,因為呢條航道就係從廣州至三文治群島(即夏威夷群島)至加州,响1840年代美國就通過戰爭响墨西哥手上搶咗加州嘅控制權,好大程度上係為咗加州响對華貿易嘅重要地位。

原圖嚟自網絡