傳統華南士紳府第—新田大夫第

早前就為史友們介紹過新界五大族之一嘅文氏，而集中喺新田嘅文氏喺南宋年間就逐步由四川徙至江西同埋廣東一帶。由於文氏一族族家境都唔錯，喺新田留低咗唔少華麗嘅建築，其中一座就係新田大夫第。

所謂「大夫第」係指有功名嘅人所建嘅府第，座落喺新田永平村嘅大夫第，係由文氏第二十一世祖文頌鑾喺清代同治4年（1865年）修建，早喺1987年就已經被列為法定古蹟。新田嘅大夫第有齊中西文化嘅特色，同時又係傳統華南士紳階級府第建築嘅典範。喺格局上係兩進三開間，中間仲有天井同埋附屬建築物，規模上真係唔話得。而且建築物上用上廣東清水青磚、《楊家將》為題嘅灰塑，仲有唔少西洋裝飾好似洛可可式浮雕，真係中西合璧。

咁到底文頌鑾係點樣有官位呢？原來文頌鑾喺光緒12年（1886年）丙戌就曾經中過進士，當年就被欽點做「營用守府」嘅職位，後來就因為「個人品行素著」而得到御賜「大夫」嘅名銜，當年嘅御賜用滿漢二文寫成嘅牌匾仲有被保留落嚟。