喺鴉片戰爭發生之前,有過唔少嘅導火線,亦都有唔少人物令到呢場戰爭真正爆發,阿史今次想介紹嘅呢位叫人物,佢既係一位外科醫生、同時亦都創辦怡和洋行,最重要嘅係,佢嘅推動咗成場鴉片戰爭嘅爆發。

威廉·渣甸1784年喺蘇格蘭出世,以16歲之齡考入愛丁堡大學醫學院學習解剖學、臨床、產科學等課程,4年之間就得到愛丁堡皇家外科學院文憑。本應順勢做醫生嘅佢,選擇加入東印度公司,成為東印度公司商船「布倫瑞克號Brunswick)」海上服務外科醫生,當時嘅佢就已經識得利用貨艙夾帶自己嘅物品、亦都用呢個配額做埋生意。

去到1817年,威廉·渣甸就離開咗呢間公司,自己去到孟買做代理,幾年之後就加入咗英國私人公司馬格尼亞克商行(Charles Magniac Co.),開始佢嘅從商之路。轉輾之下,佢同一位叫做詹姆斯·馬地臣(Sir James Matheson)嘅人組成一間東方最強大嘅公司—怡和洋行,亦都因為佢嘅商業頭腦同手段,喺貿易當中販賣鴉片同茶葉,獲得巨大財富。

咁一位商人點樣推動鴉片戰爭呢?原來欽差大臣林則徐曾經命令佢交出所有20,000箱鴉片,仲直接叫佢做「鐵頭老鼠」,令到威廉·渣甸嬲到返英國,即時就帶出義律嘅信去搵英國外相,說服國會對中國發動戰爭,仲制定詳細戰爭計劃、戰略地圖、戰爭策略,所以成個計劃又被稱為渣甸計劃(Jardine Paper)。

原圖嚟自網絡