「九龍十三鄉」係指邊度？

「元朗八鄉」、「十八鄉」之類嘅地名史友們就應該聽唔少，咁唔知「九龍十三鄉」史友們又聽過未呢？又知唔知「九龍十三鄉」係宜家嘅邊個位置呢？

所謂嘅「九龍十三鄉」係指1960年代前舊香港四區之中嘅新九龍，當中有十三條規模比較大嘅鄉村，就被統稱為「九龍十三鄉」。呢十三條鄉村由幾時開始開展就已經好難去追溯，但只可以知道直到宋朝都陸續有村民移居嚟到呢一帶。昔日「九龍十三鄉」所在嘅位置係喺今日九龍城賈炳達道以東去到鯉魚門一帶嘅東九龍地區，亦即係黃大仙、觀塘同埋九龍城呢幾個地方。

「十三鄉」並唔係一個統計，而係確確實實有十三條鄉村，包括沙埔、衙前圍、竹園、大磡、元嶺、沙地園、坪頂、牛池灣、坪石、牛頭角、曬草灣、茶果嶺和鯉魚門。以上所提到嘅鄉村好多都已經唔存在，而喺上世紀50年代就曾經因為想安置大坑東火災災民，港府就想清拆十三鄉中竹園鄉，但呢個舉動就引起強烈嘅官民衝突，最後要經過多方調停先解決到問題。而近年仲會清拆埋茶果嶺，咁「九龍十三鄉」其實就已經近乎名存實亡喇！