如果大家有經過半山區衛城道,可能都會見過一座好靚嘅愛德華時代嘅紅磚建築,呢座建築依家被用作香港歷史博物館嘅分館孫中山紀念館,但佢嘅原名係叫做甘棠第,佢原本嘅主人何甘棠真係大把故事可以同大家講。

何甘棠(1866年9月16日-1950年),原名係何啟棠,係香港富商何東同埋何福同母異父嘅細佬。佢早年喺中央書院就讀,畢業之後就做過渣打洋行嘅保險,亦都去過怡和洋行做買辦,後來佢仲去過東南亞開過商號、從事糖業、花紗、煤炭、雜貨等業務。而去到1911年,佢就辭去洋行職務,再過多十年就結束東南亞開始嘅商號,專心做慈善。

佢喺20世紀初嘅香港真係被稱為「大慈善家」,佢唔單止多次出資興建學校同埋醫院,喺疫症流行果陣,佢就創辦公立醫局免費開診;後來亦都創立廣華醫院,幫咗唔少華人爭取福利。香港政府就曾經想佢做為定例局議員,但佢全部都推晒。

除咗慈善方面,何甘棠另一樣出名嘅事就係妻妾成群。據估計佢一共就有12名妻妾,為佢生咗30幾個子女。佢嘅子女當中就有一位三女何愛瑜,係喺上海嘅情婦張瓊仙所收養嘅歐亞混血兒,後來呢位何愛瑜就生咗一代武打巨星李小龍,所以計計埋埋輩份上何甘棠都係李小龍嘅外公。

原圖嚟自網絡