尋日阿史就同大家介紹咗「九龍十三鄉」嘅由來同埋一啲現況，而喺「九龍十三鄉」嘅範圍入面，仲有「九龍四山」。

「九龍四山」，亦或者好簡單咁叫做四山，係指早年九龍東部四座用作石礦場嘅山丘同埋附近嘅村落。由於喺香港開埠初期，唔少嘅建築物對石材都有好大嘅需求，而客家人亦比較捱得，唔少人都成條村落一齊從事打石工作，以人手開採花崗岩。當年嘅石礦場就叫做「石堂」，至於四座打石嘅山就叫做「四山」，即係現時嘅牛頭角、茜草灣、茶果嶺同埋鯉魚門。

原本從事「打石」嘅村落唔止四條，係後來政府用登記制度將呢啲零散嘅村落集中埋一齊，以四山分做四條鄉村。關於「四山」仲有首詞可以講下，喺瀝源九約竹枝詞入面就係咁樣描述「清遊忽到蘇茅坪，瞥見牛頭角又生。茜草灣前多石匠，仙歌嘹亮一聲聲……」睇住呢幾句，史友們又會唔會幻想到當時呢班客家人打石嘅情況呢？

原圖嚟自網絡