早排就同史友們介紹到上古史，講完「三皇五帝」之後就有史友想阿史講埋「虞夏商周」，咁今次就同大家介紹一個未證實到存唔存在嘅朝代—「虞朝」。

虞朝，又叫做有虞氏，傳說係夏朝之前嘅一個朝代，所在嘅地方係位於山西平陸西南。喺《左傳》、《國語》入面，提到最早嘅幾個朝代，都係用虞夏商周四代連稱，而引用呢個講法嘅就有《墨子》、《呂氏春秋》、《禮記》等嘅經典。喺《左傳》入面係咁樣描述嘅：「社稷無常奉，君臣無常位，自古以然……三後之姓，於今為庶，主所知也」，當中嘅三後就係指的是三個朝代的後代，即係虞夏商三代。

咁學者又係點睇虞朝呢個問題呢？有一批學者就認為虞朝可能有幾百年歷史，估計都曾經有過大型城市，係龍山文化之一。而學者就推論有虞氏可能有好多個君主，唐堯、虞舜就係其中兩位，但係真係假，就要等有考古發現先知喇！

原圖嚟自網絡