夏朝係咪真係存在？

尋日就同史友們介紹到「虞夏商周」入面嘅虞朝，其實未有殷墟嘅發掘之前，商朝亦都被當成係傳說時期，咁比商朝再前少少嘅夏朝，到底又係咪存在呢？

根據古代文獻嘅記載，夏朝係第一個世襲嘅氏族封建王朝，亦係史書中第一個被記載嘅中原部族。據記載，夏朝入面一只經歷十四代十七個君王，延續470年之後就被商朝所滅。

呢個朝代相信係建立喺公元前2070年到前1600年，據考古學家估計，夏朝流傳落嚟嘅文物會有青銅同埋玉製嘅禮器，佢嘅年代會係新石器時代嘅晚期同埋青銅器時代嘅中期。有部分學者就覺得河南省偃師市二里頭遺址全期或第一、二期，都有可能係夏都遺址，只係當中並冇搵到類似殷墟甲骨卜辭呢類有文字記載嘅重要性文物。雖然係有咁樣嘅推測同埋有唔少史書嘅記載，但迄今都未有確實嘅證據證明夏朝嘅存在。