上世紀二十年代，喺抗日戰爭未爆發之前，其實喺中國就已經發生過兩宗同日本有關嘅慘案，兩件慘案都造成大量人命傷亡，呢兩件事件分別係五三慘案以及五卅慘案。

先講五卅慘案，就係發生喺1925年5月30日，當時正係北洋政府管治嘅時間，事件嘅起因係因為上海嘅一間日商「內外棉株式會社」第八廠入面，就被發現有一個生前受到重擊嘅童工屍體，工人相信係由日籍管理人員用鐵棍毆打致死，事後就發起罷工行動。雖然經過上海總商會調停，但冇幾耐再次因為工人權益問題而發生罷工行動，多間日本紗廠就將所有男工解僱。上海總商會再次出面，調停而喺準備復工之際，內外棉第七廠日籍資方人員就開槍打死向內外棉資方交涉嘅工人顧正紅。事件持續發酵，去到1925年5月30日，青島、上海等地嘅工人發起抗議遊行，但就受到開槍鎮壓，引發流血事件，亦係史稱嘅五卅慘案、青滬慘案。

至於五三慘案，又叫做濟南慘案，係指1928年5月3日喺國民黨進行北伐期間，賀耀組成功打敗張宗昌攻入濟南之後，同日軍發生衝突。當時兩軍曾經嘗試談判，但談判代表都被日軍殺害。日軍就要求蔣介石罷免賀耀組，蔣介石結果真係罷免賀耀組第3軍團總指揮兼南京衛戌司令嘅職位，但呢個舉動並無阻止到日軍。日軍當時就藉口話革命軍殺害咗城內12個日本僑民，就出動軍隊展開報復，殺害6000幾個中國軍人同埋民眾，連當時派遣到濟南嘅外交處處長兼國民政府外交部特派山東交涉員蔡公時同埋署內職員17人被日軍殺害，史稱五三慘案。

原圖嚟自網絡