尋日就同史友們介紹到第一位到牛津大學演講嘅中國人,有「長毛狀元」之稱嘅清代改良派思想家王韜。佢喺1870年代再次返到香港居住,仲喺1873年創立第一份華人資本、華人主理報紙—循環日報。

繼1873年理雅各返回蘇格蘭、英華書院停辦後,王韜就同香港倫敦會印務所經理黃勝合資一萬墨西哥鷹洋買落呢套印刷設備同埋活字鋼模,先喺荷李活道29號創立中華印務總局,之後一年就成立《循環日報》。《循環日報》早年訂報費係每年5圓,叫做「循環」係取「天道循環,自強不息」嘅意思。

呢份報紙早期係分做三欄,分別有選錄京報、羊城新聞同埋,中外新聞,每日報紙都會有一篇由王韜寫嘅論說,由1874年到1884年,王韜發表嘅政論就超過一千篇,就好似《變法自強》、《禁鴉片》鼓吹變法自強嘅文章。而去到19世紀中期,《循環日報》仲賣到出越南、新加坡、日本等地,直至1947年停刊。

講開又講,其實《循環日報》係逢星期一至星期六出版,原因係倫敦會出售印刷設備果陣講明,星期日係西方嘅禮拜日,所以唔可以用印刷機。

原圖嚟自網絡