尋日阿史就講到喺二十世紀初中國東北發生嘅一場日俄戰爭,呢場大敗俄國嘅戰爭令到日本國內嘅軍國主義升溫。去到1914年第一次世界大戰初期,日本就直接進攻當時嘅山東青島,亦係一戰喺遠東戰區唯一嘅戰場。

青島喺1898年被德國租借之後,既有唔少現代化設施,亦都係德國太平洋海軍「東亞分艦隊」嘅基地。青島地理位置上係山東嘅門戶、由於東臨黃海、渤海,亦都係交通、商貿同埋軍事嘅要地,唔少國家都相信,只能拎到青島,就可以控制到京津同埋江准一帶,亦即係「能為京師患者,莫如山東」。

日本對山東嘅野心早喺「甲午戰爭」就已經萌生,當時就已經派兵攻佔威海,仲想喺和約入面要求清廷割讓山東。去到一戰爆發嘅時候,日本以「英日同盟」嘅身份加入戰爭,目的係想喺中國搵機會擴張。1914年8月15日,日本最初係要求德國艦隊解除武裝,交出膠洲。德國當然唔肯,於是日本就喺用年9月2日強行登陸當時宣布中立嘅中國領土,對德軍進行圍攻。直到11月1日,日軍發動總攻,德軍彈藥耗盡之下投降。日軍隨即佔領膠州灣全境,直到1922年先肯撤軍。

日本一戰進軍山東亦都引起唔少問題,例如之後嘅巴黎和會山東問題以至後來因為山東問題而引起嘅「五四運動」。

原圖嚟自網絡