之前幾篇新市鎮專題都同史友們介紹咗唔少新市鎮就好似荃灣、沙田、天水圍等等,而今次阿史就想同大家講下唯一一座位於離島區嘅新市鎮—北大嶼山新市鎮。

可能大家見到北大嶼山新市鎮會有啲疑問,到底係講緊邊度呢?所謂嘅北大嶼山新市鎮就係講緊大嶼山北部嘅幾個位置,即係東涌、大壕灣、小壕灣同埋東北嘅部分地區,組成呢個新市鎮嘅部分更加係填海地。

早喺1970年代尾到80年代初,政府就已經有發展北大嶼嘅意向,當時係聯同赤鱲角興建新機場嘅研究入面提出,當時估計呢個區域可以建立一個容納30萬人嘅新市鎮。而隨住1989年確立新機場將會喺赤鱲角興建,東涌新市鎮嘅計劃亦都開始製定大綱,希望可以成為機場嘅支援社區。1992年《北大嶼山發展研究》完成之後,東涌新市鎮計劃其後被納入《香港機場核心計劃》,成為第9個新市鎮,計劃分4期進行,預計會喺2030年完成全面發展。

北大嶼山新市鎮亦都係香港最新嘅一個新市鎮,亦都因為呢個市鎮唔少商業、住宅同埋社區設施都集中喺東涌,所以又叫做東涌新市鎮。至於其他有污染性嘅設施好似巴士車廠、廢物轉運站、污水處理廠、廚餘回收中心等,就放咗喺小蠔灣,呢個就係北大嶼山新市鎮嘅規劃。

原圖嚟自網絡