香港第二份中文報紙《華字日報》

早幾日就同史友們講到第一份華人資本、華人主理嘅報紙《循環日報》，而早喺《循環日報》創刊之前，其實香港開埠早期就已經有兩份報紙好流行，其中一份就係《華字日報》。

《華字日報》係香港第二份中文報紙，喺1872年創刊。呢份報紙嘅其中一位創辦人陳靄庭早年係喺《德臣西報》出任副主編，後來就得到伍廷芳支持，開始獨立發行《華字日報》，初期每週出版三次。

咁到底呢份香港開埠初期嘅報紙有咩睇呢？原來《華字日報》早年係同香港人介紹清廷、粵、港以及海外嘅消息，當中就有船舶消息、貨價行情、船期、政府憲示等，而商人亦都已經識得刊登正版告示賣廣告。而講到比較益智，就係後來新加「廣智錄」，即係會有雜文、中外軼事；後來嘅「精華錄」亦會有「談叢」、「粵謳」及「歌謠」，總之就越來越豐富啦！