曾經流通世界嘅貨幣—墨西哥鷹洋

早前阿史同大家介紹香港早期報業發展嘅時候，就提到當年「長毛狀元」王韜以一萬墨西哥鷹洋買落英華書院嘅印刷設備，咁點解會用墨西哥鷹洋，呢種又係乜野貨幣呢？

墨西哥銀圓，又叫做鷹洋、墨銀，曾經係一種流通世界嘅知名貨幣，亦係喺墨西哥獨立之後先開始鑄造，最標準嘅銀圓重量係27.268克，有接近90%嘅成色。喺16世紀果陣，西班牙人就喺墨西哥開發銀礦，鑄造嘅係西班牙銀圓。呢種當時稱為本洋、佛銀嘅貨幣就通過貿易流傳到美洲同埋歐洲。

而去到1821年墨西哥獨立之後，就自行開始鑄造銀幣，亦都係通過貿易，令到唔少銀幣流入到清朝嘅中國。呢款銀幣刻有墨西哥國徽，亦都有鷹嘅圖案，一個墨西哥銀圓就等同0.7兩白銀咁用。