講到近代中國史，有一個人經常都背負住漢奸呢個名出現，佢就係汪精衛。但大家都可能估唔到，汪精衛最初果陣係做過革命黨，亦都做過唔少激烈嘅事。

汪精衛，原名汪兆銘，精衛係佢嘅筆名。佢出生喺廣東三水嘅一個家庭，父親係一個落第秀才，而佢自己亦都係清末秀才，1900年義和團事件之後做埋官費留學生，喺日本法政大學畢業。

咁到底佢係點同革命黨扯上關係呢？原來佢係透過國民黨元老胡漢民堂弟嘅關係，拜訪咗孫中山並加入同盟會，冇幾耐仲做埋孫中山副手，跟隨佢去到越南、馬來西亞等地從事革命活動。喺接住落嚟嘅幾年，革命黨六次武裝起義相繼失敗，面對反革命領袖嘅聲音，汪精衛不得不親自上陣，就試圖暗殺清朝攝政王、末代皇帝溥儀生父嘅載灃，但點知暗殺行動失敗，被捕下獄兼終身監禁，直至辛亥革命後先獲赦釋放。

至於講到佢成為漢奸，就係民國時期投日嘅事。辛亥革命後，袁世凱復辟帝制，孫中山召原本喺法國嘅汪精衛返國反袁。孫中山逝世後，汪精衛做咗一段時間嘅國民政府主席。而去到1937年盧溝橋事變之後，汪精衛主張同日本講和，當日本首相近衛文麿發表《東亞新秩序》時，佢仲發表所謂嘅「艷電」響應。冇幾耐，佢就被國民黨開除汪精衛喺黨內嘅一切職務。

於是，1940年汪精衛响南京成立由日本扶持嘅傀儡政權，參與由日本主導嘅大東亞會議，成為「漢奸」。但喺4年之後嘅11月10日，汪精衛嘅「多發性骨髓腫」舊病復發，不治身亡。

原圖嚟自網絡