維多利亞港唯一未填海嘅地方—鯉魚門

喺油塘一帶除咗有九龍四山，位處香港維多利亞港東面入口、分隔香港島筲箕灣同埋九龍東部油塘嘅地方仲有一個歷史好悠久嘅海峽，就係以前曾經係海盜據點嘅鯉魚門。

鯉魚門唔單止係一個海峽本身嘅名，呢個名仲可以應用喺海峽兩岸，即係九龍魔鬼山同埋港島阿公岩一帶，只係香港島鯉魚門知名度遠遠不及九龍東嘅鯉魚門。早喺明朝《粵大記》有關香港一帶嘅地圖入面，就有鯉魚門嘅地名出現。而去到清朝年間，呢個地方就成為咗海盜嘅據點，據講張保仔都曾經喺度出現。

去到二次世界大戰，港島鯉魚門就曾經被用做防守要塞，受到日軍猛烈攻擊。時至今日，呢個有住悠久歷史嘅地方就先後做過農業、礦業，依家就發展成海鮮美食區。