尋日阿史就同史友們介紹到汪精衛所建立嘅偽政權，而呢個偽政權第二號人物就係陳公博。

陳公博出生嘅廣東南海縣嘅一個官宦之家，佢嘅父親陳志美就因為鎮壓太平天國有功曾經做過廣西提督，「賜穿黃馬褂」。陳公博自細閱讀《水滸傳》、《三國演義》，年僅15歲就組建「三點會」反清，後來失敗被囚禁。

1917年，陳公博於廣州法政專校畢業，仲去埋北京大學哲學系進修。大學畢業嘅佢喺1920年去到廣州，同陳獨秀、譚平山等人組成中國共產黨廣州支部，後來就因為支持反對北伐嘅無政府主義者陳炯明而被留黨處分，事後就退黨去到美國留學。

1925年，陳公博喺哥倫比亞大學碩士畢業，返到廣州加入國民黨結識汪精衛，先後擔任國立中山大學代理校長、黨部書記、國民政府廣東省工農廳長，去到1926年仲喺國民黨第二次全國代表大會上當選中央執行委員。

喺九一八事變發生之後，汪精衛同陳公博一度重返國民政府，但最後都係辭職離去。而喺抗戰正式爆發之後，汪精衛同日本暗中交涉談判，組成偽政權，陳公博出任首任立法院長兼上海市長，喺汪精衛死後，佢仲兼任行政院長、軍事委員會委員長等職位。

喺日本投降之後，佢就解散偽南京國民政府，逃到日本，最後被引渡回國受審，以通謀敵國罪成立，處以死刑。

原圖嚟自網絡