牛頭角命名真係因為似牛頭？

上次就同史友們講到香港市區最後一個開展重建嘅徙置區牛頭角下邨，有史友就問阿史，到底牛頭角呢個地名係點嚟，咁阿史今次就講一講啦！

牛頭角，即係位處觀塘中部、佐敦谷以南、九龍灣以東嘅一個地方，喺1950年代之前，牛頭角其實仲係一個山頭，冇乜建築物，但就可以通過牛頭角碼頭水路去到灣仔。呢個以往係由客定人聚居嘅地方，現時就主要係以住宅區為主，以前就係九龍四山之一，主要從事打石工作。早喺客家瀝源九約竹枝詞入面，就有出現對牛頭角嘅描述「清遊忽到蘇茅坪，瞥見牛頭角又生。茜草灣前多石匠，仙歌嘹亮一聲聲……」，由呢首詞度睇，其實九龍十三鄉嘅部分村落名都出現喺度。

咁到底牛頭角命名係咪真係因為似牛角呢？喺九龍灣填海之前，由舊時嘅地圖都可以睇到，其實當時位於牛頭角海灣嘅海岸線由於突咗出嚟，成個形狀都好似牛角，所以就流傳住牛頭角因為似牛角都咁樣命名。之不過，隨住填海工程發生後，牛頭角現時就已經成為內陸地區。