呢排阿史喺介紹晚清同埋民國史嘅時候,唔多唔少都會提到當年嘅革命黨興中會,楊衢雲就係當時與中會嘅重要人物之一,喺香港跑馬地墳場入面就有座無名碑同佢有關。

楊衢雲出生喺1861年嘅廣東東莞,幼年跟隨父親嚟到香港聖保羅書院就學,十四歲嘅時候因為一次意外而失去右手三指,亦都因為咁而決定從事文職,先後做過教員同埋招商局總書記,及沙宣洋行副經理等。

去到1890年,佢同與謝纘泰等十幾人組成輔仁文社,以「開通民智」、「盡心愛國」為宗旨,既會討論中國發展之路,又主張推翻滿清,冇幾耐就同孫中山嘅興中會合併,楊衢雲被選為會長。

喺1895年10月嘅廣州起義入面,楊衢雲喺香港擔任總指揮,但就被清政府事前得知呢個計劃令到陸皓東等七十多人被捕,而楊衢雲亦被通輯。去到1901年,楊衢雲辭去興中會會長一職之後,被清廷派出之刺客陳林開槍刺殺,享年40歲。

佢嘅好朋友就安排將佢下葬喺跑馬地香港墳場,墓碑冇留到名,但就刻有編號6348,並且用天圓地方概念設計,直到2011年9月,香港政府先喺6348號墓碑豎立楊衢雲生平說明牌。

原圖嚟自網絡