早幾日阿史就同史友們介紹到牛頭角下邨嘅歷史,牛頭角下邨係香港市區最後一個進行重建嘅徙置大廈,而其實成件重建嘅計劃都係源自1987由香港房屋委員會展開嘅「整體重建計劃」。

整體重建計劃係由1987年起至2012年推出嘅一項大型重建計劃,目的係想將第三至第六型徙置大廈及政府廉租屋又或者仍未拆卸嘅第一至二型徒廈重建。事緣係自從1985年26座問題公屋醜聞爆發之後,全港一共發現有577座樓宇存在結構問題,當中就有26座因為結構遠低於安全標準而有倒塌危險。由於呢批大廈唔少都係第三型大廈或者廉租屋,所以港府就有清拆嘅決定。

由1988年起,房委會就以每5年作為一個拆卸總綱計劃,按照樓宇結構損耗程度決定清拆次序,清拆後多數都會重建為新型屋邨大廈。直至牛頭角下邨二區全部樓宇拆卸之後,成個計劃亦都正式完結。

原圖嚟自網絡