何鴻燊雄霸澳門賭業半世紀

有賭王之稱嘅何鴻燊病逝，網上即刻出現好多佢生平嘅故事。何生一生充滿傳奇，其中佢响1961年聯同霍英東、葉漢、葉德利等人組成財團奪得澳門賭牌，更令佢成為縱橫港澳嘅一代賭王。

响1961年，何鴻燊妹夫葉德利游說何鴻燊競投澳門賭牌，呢個賭牌自1937年起就由傅老榕同高可寧家族持有，後嚟葉漢、葉德利、何鴻燊、霍英東合作，創辦澳門旅遊娛樂公司，去爭個賭牌。最終，佢哋以316萬7000元，較傅老榕同高可寧家族標價多出17000元，奪得賭牌。就係咁，澳娛就開始半個世紀壟斷式經營。

不過，何鴻燊生前响訪問提過，啱啱攞到賭牌個陣其實好多波折，因為舊經營者唔肯咁簡單放手，何鴻燊仲話當時有人威脅佢，話如果佢敢開檔，就可以買定棺材。雖然佢話唔怕威脅，不過佢都話賭場開咗三年左右啲人先敢幫襯。