香港有極其豐富嘅非物質文化遺產，而喺表演類別入面就有一樣好特別嘅曲藝—南音。南音當中就以地水南音被視為最正宗嘅一種，而喺香港呢隻曲藝最出色嘅演唱者就係杜煥。

杜煥，被同行尊稱為拐師傅，亦都因為經常吸食鴉片，於是佢呢種獨特嘅唱腔就被稱為「煙屎喉」。自小家貧嘅杜煥喺三歲嘅時候失明，1923年開始就喺廣州拜師學習地水南音，後來就先由澳門移居嚟香港。起初杜煥就只係喺油麻地廟街妓寨賣唱，一支曲價值2蚊。

去到1952年至1972年，杜煥機緣巧合就去到香港電台嘅節目《地水南音》演出南音，每次嘅酬勞就已經去到35蚊。亦都係因為咁，佢演唱嘅地水南音就變到廣為人知，《客途秋恨》、《男燒衣》、《梁天來》等等，仲曾經去過大會堂、中文大學、甚至係德國嘅歌德學院表演。

杜煥亦都曾經收過徒弟，唐健垣就係現時香港杜派南音唯一傳人，唐健垣亦都為杜煥錄低唔少音響資料及曲詞。喺1979年杜煥過身之前，佢主要就喺上環水坑口富隆茶樓自彈古箏伴唱，曾經留低過40幾個鐘嘅現場錄音。

原圖嚟自網絡