喺2000年6月1日凌晨零時，位於屯門望后石、香港最後一個越南難民中心正式關閉，營地隨即由民安隊接管，亦都意味住安置越南難民嘅問題暫告一段落。

由1970年代到80年代起，因為南北越戰爆發而流離失所嘅越南難民紛紛逃亡，由1975年5月4日就有第一批為數3,743人嘅難民嚟到香港，當時港府係採取全數收容嘅政策。而之後幾年亦都陸續有難民嚟到香港，加上1970年代尾，英國政府就喺日內瓦簽署一項關於處理越南難民問題國際公約，就宣佈將香港列為「第一收容港」，去到1980年所收容嘅難民就已經超過10萬人。

踏入1990年代，對於越南難民嘅政策有所改變，港府開始採取有秩序遣返行動，就好似自願遣返咁，但肯咁做嘅人少之又少，最後都變成強逼遣返。如何安置呢班難民就成為咗港府一個難題，足足困擾咗25年，高峰期香港一共有20萬名船民，喺經濟同治安方面都有一定嘅影響，多年嚟仲發生過幾次嚴重嘅的難民營騷動，例如1992年「石崗船民中心」騷動以及1994年「白石船民中心」騷動等。

直到2000年6月1日，香港最後一個越南難民營關閉，而呢批難民其中143,714名獲得外國收容，6萬7千位船民被遣返。按估計，當年香港每年大約需要花費公帑1萬2千港元收容1位越南難民，直到1998年，聯合國難民專員公署就差落香港11.62億港元嘅債項。

原圖嚟自網絡