早幾日阿史就同史友們介紹過甲骨文嘅出現令到商朝嘅由傳說時期變成信史時代,而發現甲骨文嘅地方係河南安陽殷墟,但喺發掘呢個考古遺址之前,其實就曾經有農民耕地嘅時候發現到甲骨文,既將呢啲龍骨壓成粉末自己醫病,亦都有將呢啲龍骨賣到中藥鋪,呢個人叫做李成。

李成喺一次機緣巧合嘅情況下,喺河南安陽市小屯村發現到甲骨,由於佢身上生滿膿瘡而又冇錢醫病,所以就將自己挖出嚟嘅龍骨壓成碎末後敷到身上,估唔到呢啲龍骨可以吸盡膿水同止血,於是佢就將呢批龍骨賣到中藥鋪。

故事仲未完,清末光緒二十五年(公元1899年),當時嘅清朝最高學府國子監祭酒王懿榮由於患咗瘧疾,就搵人去宣武門外達仁堂中藥店買咗一服中藥,而呢位王懿榮就發現到龍骨上面有特殊符號。王懿榮本身就係金石學家,亦都係一位考古學家,呢下就引起咗王懿榮好奇心,刻痕既唔似大篆亦都唔係小篆,反而可能係珍貴文物,於是就大規模咁去搵呢類龍骨返嚟。

經過長期嘅研究,王懿榮對甲骨有系統嘅研究,就發現到「雨」、「日」、「山」、「水」等字。點知喺呢個時候,八國聯軍就入侵,佢就被任命為京師團練大臣,而去到1900年7月,兵臨城下,王懿榮選擇寫了一首絕命詞服毒墜井年方56歲,佢大部分嘅甲骨就留畀劉鶚繼續研究,而後世就將王懿榮尊為「甲骨文之父」。

原圖嚟自網絡