以前嘅香港玩樂嘅設施同地方都唔多，當時嘅人如果想出去玩，主要都係以自然環境為主。而喺1940年之前，其實香港嘅港島就曾經有八個美景，統一被稱為「香港八景」。

點解要係八景呢？據講呢八景係由一位考古學家陳公哲親自挑選出嚟，而嚟到近代由於地勢同埋城市建設令到八景入面唔少嘅景象都唔同晒。講返八景先，分別就有位於扯旗山嘅「旗山星火」、盧吉道棧道嘅「仙橋霧鎖」、鵝澗嘅「鵝澗榕陰」、鴨脷洲「鴨洲帆影」、赤柱「赤柱朝曦」、薄扶林瀑布灣「扶林飛瀑」鯉魚門「鯉門夜月」以及大浪灣「浪灣海浴」八個。當中鵝澗早喺1920年代就已經被填平，薄扶林瀑布灣亦因為1863年水塘嘅出現而冇咗飛瀑嘅效果。

雖然係叫做「香港八景」，其實當中有啲景點係同「新安八景」好相似，有機會阿史再同大家介紹下。

原圖嚟自網絡