讀書個陣成日都話香港自古以來係中國一部分,其中一個歷史證據就係南宋末年皇帝仔走難嚟咗香港,九龍城仲有宋王臺。但原來响澳門,都有類似嘅歷史故事。

响澳門沙梨頭土地廟,有一個「宋王璧」,呢個地方同宋王臺類似,被認為係宋帝出現過嘅地方。响宋帝走難嘅事蹟當中,就話佢同隨從响淺灣出現,唔少人都認為淺灣即係今日香港嘅荃灣,但亦有人認為係澳門嘅沙梨頭。所以,响澳門沙梨頭土地廟就有一個「宋王璧」喇!至於係真定係假,好似仲未有一個確實講法。而據《宋史》所載,宋室就曾經退守一叫「井澳」嘅地方,但遇上颶風。而呢個叫「井澳」嘅地方,大概就係响今日橫琴一帶。所以話宋帝走佬時去過澳門,都未必係吹水。

原圖嚟自網絡