早排就有新聞講到喺安徽發現一個李鴻章家族嘅棺材,當中採用咗日本進口嘅水泥同埋糯米汁等材料澆築,係當時極為罕見嘅工藝。有史友就想阿史講多啲李鴻章嘅事,咁今次就介紹下呢位晚清重臣啦!

李鴻章,生於1823年,後世稱佢為李中堂。佢出生自安徽一個名門望族,父親李文安同曾國藩同年喺道光二十八年考取進士。喺家中排行第二嘅李鴻章曾經喺曾國藩府中受丈,最後以二十四歲之齡考中進士,先入翰林院任庶吉士。

李鴻章曾經官至東宮三師、文華殿大學士、北洋通商大臣、直隸總督等,後來仲被追封為侯爵。喺佢嘅官場生涯入面,佢就歷經太平天國事件、捻軍、洋務運動、義和團、中法以及甲午戰爭等,亦都為救當時嘅晚清作出過唔少努力,所以被稱為當時世上嘅四大偉人之一。

李鴻章係准軍以及北洋水師嘅創辦人,亦都係洋務運動嘅領袖,曾經代表過清政府簽訂《越南條約》、《馬關條約》、《中法簡明條約》等,近代史學家唐德剛認為李鴻章生於晚清嘅時期,有住靈巧嘅外交手腕,一方面為衰死嘅晚清救亡,另一方面雖然代表清朝簽訂唔少不平等條約,背上賣國賊罪名,但後世唔少學者都認為佢亦都盡咗力去抵禦列強,所以對佢嘅評價就係以下呢一句「內悅昏君,外御列強」。

原圖嚟自網絡