香港機場核心計劃之一 機場快綫

之前阿史都同大家介紹過上世紀一項規模龐大嘅基礎建設「機場核心計劃」，當時就決定要將大嶼山赤鱲角興建國際機場為核心，一共就有十項嘅核心工程去強化香港作為航空中心嘅地位。除咗之前介紹到嘅東涌新市鎮，機場快綫都係呢項計劃入面嘅其中一個重點。

機場快綫，喺未通車嘅時候係諗住叫做飛翔快綫，喺1998年7月6日開通營運，一共分成五個站連接住赤鱲角國際機場、中環嘅香港站等。呢條鐵路屬於機場聯絡軌道系統，全長35.3公里，最高時速可以達到140公里，係以特快形式運行。據官方數據統計，機場快綫耗資351億港元興建，由機場去到中環市中心，全程就只係需要24分鐘。

呢條鐵路喺通車嘅時候成為香港第一條來往機場至市區鐵路綫，建成最初就只有四個站，直到2005年12月啟用機場博覽館站之後，就令全線新增到5個站。