响今年充滿爭議嘅文憑試考題當中,其中一段資料就提及過漢冶萍公司。相信讀過中史嘅史友都聽過昔日中國呢間企業,但唔知大家又知唔知呢間中國企業,曾經係亞洲最大嘅鋼鐵企業呢?

漢冶萍公司出現於1908年,但其實早响呢間企業出現之前,企業嘅前身已經存在。响1890年湖廣總督張之洞籌建大冶鐵礦,以西方技術(即機器)開採鐵礦。佢又响1891年籌建漢陽鐵廠,後嚟鐵廠改為官督商辦,承辦人就係盛宣懷。盛宣懷為解決漢陽鐵廠燃料供應嘅問題,於是响1898年創建萍鄉煤礦,引進西方技術以機械生開採、運輸、洗煤等。到咗1908年3月,漢陽鐵廠、大冶鐵礦同萍鄉煤礦就合併組成漢冶萍煤鐵廠礦有限公司,仲由官督商辦改為完全商辦公司,公司總理為盛宣懷。

唔好以為漢冶萍公司係滿清時期嘅企業,規模同出品就一定差。事實上當時嘅漢冶萍公司,無論產量抑或技術都係亞洲第一。無論係漢冶萍公司抑或前身嘅漢陽鐵廠,產品都受到好評,好似漢陽鐵廠嘅產品就响日本參展過,1911年漢冶萍公司出品嘅礦產參加意大利羅馬美術會仲獲得最優獎。1915年,美國巴拿馬世界博覽會上,漢冶萍公司生產嘅鋼鐵獲名譽獎章。

不過,當時嘅日本就睇中漢冶萍公司响技術同背後嘅天然資源,於是想盡辦法去控制呢間公司。好似响《二十一條》中就提出將漢冶萍公司改為中日合併,目的就係企業控制嘅天然資源。亦由於呢間公司一直响日本借錢,所以响民國時期,呢間企業完全被日商所把持。

原圖嚟自網絡