遇到財困嘅國泰航空,終於要特區政府出資救亡喇!最近政府交俾立法會嘅文件就透露,將透過《土地基金》撥出款項資助國泰航空,向集團提供過渡貸款共涉款273億,政府將有權任命兩名觀察員進入國泰嘅董事會。消息一出,唔少人都覺得呢個消息好爆,仲問土地基金到底係乜東東?

土地基金之所以出現,其實係同回歸前一個具過渡性安排有關。中英兩國簽署嘅《中英聯合聲明》就規定咗,《聲明》响1985年5月27日生效之日起至1997年6月30日為止,港英政府賣地所得收入就要由港英政府同香港特別行政區政府均等平分,所以香港特別行政區政府土地基金信托就响1986年成立,負責收取同保管呢啲收入。到咗1997年7月1日,特區政府正式成立,土地基金信托嘅資產就移交到特區政府手中,成為政府儲備的一部分。後嚟臨時立法會响1997年7月23日根據《公共財政條例》第29條制訂同通過一項決議,設立咗土地基金,呢個就係土地基金嘅前世今生喇!

土地基金現時就由金融管理局根據財政司司長嘅指示管理,土地基金諮詢委員會就土地基金嘅投資策略同管理方針向財政司司長提供意見。咁依家土地基金到底有幾多錢呢?據文件指,依家基金個結餘約為2,200億元。嘩!

原圖嚟自網絡