西貢曾經有條以窰燒為生嘅村落？

之前就同史友們介紹過喺九龍四山一帶以打石為生嘅客家人村落，而嚟到西貢呢邊，曾經都有一條客家村落，之不過佢哋所經營嘅並唔係打石業，而係窰燒。

喺新界東西貢區北潭涌，就有一座現時被活化成上窰民俗文物館位嘅建築物，連同鄰近一座灰窰喺1981年被列為法定古蹟。呢條上窰村係由寶安縣移居過嚟香港嘅黃姓客家人所建立，以前係以建窰燒造殼灰、灰泥、肥田料等為生。，亦都因為咁樣而致富。據講只要灰窰一旦開始燒製，工人就需要七日七夜去為灰窰引火打氣，工序相當繁複。但隨住英泥及造磚行業出現，令到窰燒工業大不如前，村民亦都離開村落另覓生計，上窰村亦都逐漸荒廢。

現存嘅上窰村係喺百五年之前建立，由一排八間屋組成，建立之時為咗解決潮汐漲淹問題，成個村落都建立喺一個兩米高台之上。上窰村仲有曬坪及其他附設建築結構好似廚房、牛欄、豬舍以及一座六米高用嚟防盜嘅更樓。館內仲設有各種耕種工具、農村傢具，畀大家認識早期客家人嘅鄉村生活。