螺洲曾經發生過人食人慘劇？

蒲台島相信又唔少史友都會聽過，甚至仲去過島上玩，但喺呢個島嶼附近有個叫做螺洲嘅無人荒島，唔知又有冇史友聽過呢？喺上世紀40年代，呢個小島仲發生過人食人嘅慘劇。

螺洲其實係位於螺洲門、螺洲白排一帶，而喺1944年7月就發生過一件慘無人道嘅悲劇。當時香港仍然係處於日佔時期，據講冬天嘅時候日軍就將400幾個港人送到螺洲唔畀水同食物，由得佢哋自生自滅。而且，螺洲門係香港水域極深水嘅地方，唔少人想嘗試游水走人都係以失敗告終。

當時正有一位從事魚類買賣嘅黎金成到螺洲一行，見到呢400位難民被憲兵用2艘船留咗喺島上，後來仲有唔少對岸鶴咀村居民話聽過由螺洲傳來嘅慘叫聲。當村民想去呢個小島上面果陣，島上就已經骸骨處處，滿目瘡痍。根據朱維德在《香港掌故》所載，仲推斷曾經發生過人食人慘劇，島上嘅「白骨洞」亦都係因為咁而得名。