尋日就同史友們介紹到義勇軍進行曲嘅原型係來自一套1935年電影嘅主題曲《風雲兒女》,而出版呢首歌曲嘅唱片公司講起就真係有段故喇!

呢間公司就係喺1909年成立嘅上海百代唱片,佢嘅前身係由法國人E.Labansat 創立嘅「柏德洋行」,早年係通過街頭擺放留聲機播放唱片起家,後來自成立到柏德洋行專門售賣留聲機同唱片。而喺1909年,上海百代唱片亦都成立埋,係20世紀上半葉最具規模唱片公司,喺唱片數量、品種同質素都比其他公司優勝,初時仲有京劇等中國戲曲,喺中國收音之後送返歐洲壓製成片,再運返中國各地發行。踏入1920年代,百代唱片就已經成為行業龍頭,唱片仲賣到南洋同北美。

後來,英國哥倫比亞唱片公司喺1930年代收購法國百代公司,仲將百代併入香港註冊嘅「英商電器音樂實業有限公司」,當時嘅唱片發行量已經達到年產量二百七十萬張,認真誇張。但隨住抗戰爆發,位於上海嘅百代公司被日軍視為係敵國資產,一度被日本唱片商「日本蓄音器商會」接手,直到1945年日本投降後先歸還畀英商。

原圖嚟自網絡